Еден од почестите проблеми во врските е романтиката, поточно, онаму каде што ја нема. Му замерувате на партнерот што не е повеќе романтичен и што ја користел романтиката само додека не ве освоил!?

Што е романтика? Дали вие сте романтични и што подразбирате под поимот романтични гестови, а што вас воопшто не ви стига до срцето? Дали е тешко да ве освојат со само на вам посветени романтични моменти или пак сметате дека романтиката е исто што и патетиката?

Го отфрлате секое екстремно однесување. Женските често ги отфрлаат машките кои се премногу романтични бидејќи тоа ја покажува нивната нежна, женска страна, која е спротивна со мислењата за машките.

Исто така на женските им пречи ако машките не се воопшто романтични и не придаваат на тоа голема важност. Не разбираат дека на нив им е потешко да ги изразат романтичните мисли. Нешто повеќе од букет цвеќе и интимна вечера за двајца тешко можат да смислат.

Затоа на тоа поле владеат женските. Фустанот кој го носат може да биде романтичен, шнолата во коса, нежната шминка на лицето, се тоа на прв поглед ги освојува машките. На машкото му останува само да земе пијалок на вечерата, а свеќите на масата ќе ги запали таа.

Романтиката за жал, е тeсно поврзана само со почетокот на врската и евентуално за Денот на вљубените, кој во последните неколку години почна да се одбележува и кај нас. Останатите денови машките се трудат да не бидат романтични, како тоа да е срамота и понижување.

Некои пак сакаат романтиката да биде "јавна", т.е. да се искаже на јавно место, каде што ќе има што повеќе очевидци кои ќе им се восхитуваат. Се зависи од личноста на која и ги упатувате романтичните зборови или пораки. Можеби вашата драга, односно вашиот драг, повеќе сака тие романтични моменти да се случат кога сте сами, затоа што така повеќе им значат и не мораат да ги делат со публиката.

Можеби на вас ви е интересно под неговиот или нејзиниот прозор со спреј да напишете љубовни пораки, но што ако вас таа љубов не ви е возвратена? Никогаш не се знае, но во тоа е и целта таа магија. Магија која трае и не зависи од тоа дали е таа личност веќе освоена.


Покрај купувањето цвеќе, романтичните излегувања, гледање на залезот на сонцето заедно, постојат и некои други начини за искажување на вашите чувства. Љубовните писма се некако занемарени, како и испраќањето на романтични фотографии во црно-бела боја, затоа што повеќето мислат дека тоа се правело некогаш и дека повеќе не е популарно.


Но, дали може некој да каже дека не се радува кога ќе види писмо во своето поштенско сандаче? (Се мисли на класично, реално сандаче и писмо кое го носи поштарот,) Зарем морате да чекате некој кој ви е битен да отпатува за да се сетите да му/и кажете колку ви недостасува? Секако тука е е-маилот, но нема поштенска марка, го нема вашиот ракопис и потпис, мирисот и кинењето на ковертот.

Ако баш не ја разбирате идеата на пишувањето и ако немате убав ракопис, можете да го искористите и интернетот. Направете си ваш заеднички сајт, напишете ја вашата љубовна приказна, без разлика дали е среќна или тажна, "закачете" слики, внесете аудио делови од неговите/нејзините омилени песни на сајтот, и посветете го сето тоа на вашата посебна особа. Никој после тоа не може да ви каже дека незнаете што е романтика.

Трудете се околу вашиот партнер за утре да не ве остави поради само една ружа која му е поклонета.

Прочитајте повеќе