Безброј дилеми на првото излегување со момчето или со девојката што ви се допаѓа - како треба да се однесувате, што не смее да направите и како да ги протолкувате сигналите што ви ги испраќа другата страна. Многупати досега се делеле совети на оваа тема, а овојпат ви донесуваме десет најважни правила кои ќе ви помогнат на првиот состанок.

1. Не откажувајте се
Ако на првиот состанок сè тргне наопаку - не очајувајте. Колку повеќе луѓе запознавате и излегувате со нив, поголеми се шансите да ја најдете својата сродна душа. Освен тоа, подобро да работата да пукне на првиот состанок отколку да загубите драгоцено време со погрешна личност.

2. Бидете оптимист
Ништо не е попривлечно од личност која е задоволна од својот живот и е добро расположена. Позитивниот став е клуч до успехот, а насмевката е заразна. Од друга страна, никој не сака да излегува со намуртенковци.

3. Блеснете
Претставете се во своето најдобро светло. Покажете ги најдобрите особини и изгледајте најдобро што можете. Сепак, тоа не значи да глумите и да се преправате дека сте нешто што не сте. Дури и ако првиот состанок не помине најсјајно, блеснете на следната средба.

4. Не зборувајте за брак
Внимавајте разговорот да не ве одведе кон брачните води. Во никој случај не набројувајте ги сите што ги знаете кои се во брак и имаат деца. Тоа може да биде протолкувано како очај или како желба и самите да застанете пред олтар со првата личност што ќе се фати на јадицата.

5. Не зборувајте за бившите
Ако соговорникот ве праша за поранешните врски, одговорете дипломатски: „Едноставно не одеше“ и сменете ја темата. Не откривајте премногу информации прерано. Деталите зачувајте ги за подоцна, кога подобро ќе се запознаете, и ако меѓу вас се развие нешто подлабоко.

6. Бидете љубезни со келнерите
Ако персоналот на кафулето или на ресторанот каде што сте седнале ви приреди некое непријатно изненадување, останете присебни. Не правете сцени и не драматизирајте непотребно. Сигурно не сакате личноста со која првпат сте излегле да помисли: „Каков/каква ли е далеку од јавноста?”.

7. Претворете се во уво
Гледајте ја личноста со која комуницирате во очи и бидете добар слушач. Така ќе и' ставите на знаење дека не сте себични и дека навистина ве интересира тоа што има да го каже. Луѓето сакаат да зборуваат за себе, особено мажите. Но, ако некој и не знае да зборува на тема што вклучува нешто друго освен „јас“, веројатно и самите нема да посакате да излезете на втор состанок.

8. Дозволете другиот да каже нешто
Ова правило се надоврзува на претходното. Монолозите ретко се добредојдени, особено на првиот состанок. А ако добиете етикета „алапача“, заборавете на повторната средба.

9. Внимателно со алкохолот
Нема поедноставен начин за уништување на првиот состанок (и на кој и да е друг) од алкохолот. Ќе оставите лош впечаток и ќе си ја расипете вечерта. Значи, нема да добиете ништо. Освен тоа, претерувањето со алкохолот може да биде причина за прекршувањето на правилото број 10.

10. Не соблекувајте ги панталоните :)
Сексот на првиот состанок не е пожелен. Прво, за да не добиете етикета „лесни“. Второ, за да не изгустирате се во еден ден и да оставите и за себе, а и за другата личност нешто на што ќе мислите до следната средба.

Прочитајте повеќе